كيف نرفع شعوري بـالإستحقاق💌

1.راقب أفكارك تجاه الناس لأنها حـتنعكس عليك، اللي تحبه لـنفسك حبه لـغيرك.

2.أشحن بطاريتك كل يوم لأن مستحيل تعرف شن تستحق و أنت مش مشتغل على روحك و مش عارف شن فيك من مميزات.

3.خليك واعي للناس اللي حوليك و دورهم في حياتك، في ناس ديما تقلل منك و قفتهم عند حدهم و ما تضحكش ولا تجامل ولا ترضى
بـالإهانة لـنفسك حتى لو بصارة.

4.ركز على الوقت اللي يجيك فيه شعور بـالملل (الملل نعمة) لأن حاجة تجيك باش تنبهك ان الي ادير فيه غلط و مش مناسبك و مفروض توقف
وقف لأنك تستحق احسن من هكي و تستحق حياة أحسن
الكساد و الملل زي المنبه اللي يجيك كل مرة باش تعدل بيه طريقك و يدلك على الشي اللي تستحقه و تستاهله.
🩷

شعور الإستحقاق💌

لما يصير خلل في شعورنا بـالإستحقاق تبدا المشاكل كلها..
يبدا الضعف، يبدا التنازل، يبدا الشعور بـالنقص، يبدا الحسد، تبدا الغيرة، يبدا الإحباط و الفشل و الحسرة

معادلة الحياة إنه كل ما حسيت إنك صغير و ناقص أو ما ليكش قيمة، فـكُل شي حـتحسه أكبر منك
الدراسة أكبر منك، العمل أكبر منك، الزواج أكبر منك، الإنجازات أكبر منك
ولو ما كانش عندك شعور الإستحقاق مش حـتقدر ولا حـتعرف تطلب شي و حـتحس أنْ طلباتك كبيرة عليك و ثقيلة كأنه ما عندكش ولا ليك حق إنك تطلب
من عيلتك، من زوجك، من أصدقائك، من زملائك، و من أي شخص

أي شخص ماعنداش إستحقاق حـيحس كـإنه مكتف و إن أي مكان أو منصب كبير مستحيل يكون فيه

#الـخلاصـة🌸
لما تشوف نفسك تستحق أي شي أطلبه ما تتحشمش ولا تخاف ولا تتردد
أنت أكثر حد تعرف حقوقك و مجهودك و شن تستاهل
في المقابل سوا في حوشك أو دراستك أو خدمتك أو في أي مكان كنت فيه خلي إستحقاقك عالي و ما تتنازلش ولا تقلل من شانك
💕🫂

المرأه القوية💌
سيدة نفسها، عجوز بعقلها، طفلة بروحها، رجل بمواقفها
قد تتحطم بعض الشيء، لكن بإصرارها تستعيد ذاتها و تبني حطامها فهي ملكة بمواقفها لا بعمرها
و تكون سيدة الموقف رغم الضروف.
🤍🦢

?..

المجهود اللي بتستخدمه في تشويه سمعة غيرك، استخدمه في تنظيف نفسك من الحقد و الحسد و الكُره و الغيرة و الظلم و النميمة
ربنا عز وجل قال في كتابه:
(وقد خاب من حمل ظلمآ).

الحسد ظلم و الغل ظلم و الحقد ظلم
كل الحكاية إنا نحن بنحاسب على مشاريب نفوس مريضة و أيضاً ربنا طمنّا و قال:
(لا تخف ولا تحزن إنا منجوك).
?

من آداب الضيافة?

أن لا تستأذن في التقديم:
هل أعمل لك القهوة، هل تريد تشرب الشاي، بل تُقدّم من غير استئذان

و من آداب الزائر:
ألا يقترح طعام معين، إلا إذا علم أن مضيفه يسر بإقتراحه
و ألا ينظر إلى أصحابه حال الأكل لئلا يستحو
?✔️

في الوضع الطبيعي..
أنا إنسانة لا نهِش ولا أنِّش و الشي هدا بـإختياري طبعاً
نحب نكون في حالي و ماليش علاقة بحد و عقلي في كوكب ثاني
فـممكن بتاخد عليا فكرة اني ساذجة حسب ما هو واضح
فـايجي إنسان آخر يهِش و ينِش و يحي يتشاطر عليا فـأنوض مفعلة مود أسوأ نسخة مني فـيزعل الإنسان الآخر!

#الخلاصـة?
عمركم ما تستهينو بـحد في حاله و تستفزوه، لأن ممكن لو يطلع وجهه اللي داسه حـيمسح الأرض بـكرامة اللي يفكر يستصغره أو يهينه.
?

?..

نصيحة لأي حد..

اخدم على نفسك و ما تضيعش وقتك في شي مش حـيغير فيك او حـيطورك
كل الي حوليك حـيتغير، البعض حـيخذلك و البعض مش حـيقدر يكون معاك لانه ظروفه اقوى من انه يكون جنبك و هادي طبيعة البشر

الحاجة الوحيدة الي مستحيل تخيبك او تخذلك هي العلم و المعرفة، كل ماطورتها كل مارفعاتك لـمكان ابعد من يلي حلمت بيه
الكورسات، ورشات العمل، الكتب، الابحاث، التدريبات،...
هاذي الأشياء الوحيدة الي بتلقاها

ارفع سقف طموحك و حـتمر بـتغيرات كبيرة
كل شي حـيتغير الا الحلم الي تخدم عليه، هاذي البوصلة الي تحدد عليها وجهتك
ماتزعلش على اي شي خسرته
الا الوقت الي استثمرته في شي مش ليك

و تفكر دايماً..
إن كل وقت ليه ناسه و حـيجي الوقت الي حـيكون ليك.
?

_10.محرم.1446?

اللهم اني أسألك الثبات في الامر، و العزيمة على الرشد، و أسألك موجبات رحمتك، و عزائم مغفرتك، و أسألك شكر نعمتك، و حسن عبادتك، و أسألك قلبا سليما، و لسانا صادقا، و أسألك من خير ماتعلم، و أعوذ بك من شر ماتعلم
إنك أنت علام الغيوب.
?

العلاقات المحرمة?

حـتعيشو لحظة سعيدة أو ربما لحظات
ممكن تستمر شهر شهرين سنة أو ربما أكتر و ربما حتى تنتهي هـالعلاقة بالزواج
لكن..
النهاية حـتكون مؤلمة جداً
خيبة أمل و ربما فقدان ثقة أو حتى شك
و ربما تنتهي العلاقة بـالفراق
ليش!؟
لأن العلاقات المحرمة تفشل مهما كان الحب قوي

و العلاقات اللي بدايتها لا ترضي الله، نهايتها لن ترضيك.
?✔️

أنا كـ(منال)..
نتمنى نتزوج راجل أعلى مني في بعض الأمور و سابقني بـخطوات و عنده خبرة و ثقافة و نضج و وعي في الحياة أكثر مني
نبدا معجبة بكلامه و طريقة تفكيره و معالجته للأمور، ليش؟

•لأن أنا مانسلمش في شغلي غير للأعلى في مجاله عشان مايضيعنيش، فلما نسلم نفسي و أحلامي و حياتي و مستقبلي، نسلم كل هدا لمني؟
للأقل = غرقنا يا عمو سامي
للمكافئ = في الزواج لا نتزوج المكافئ نتزوج الكِفْء
و الكفء في نظري لا يكون كفئًا إلا إذا كان أعلى.

•الراحة من نعيم الجنة و هي مطلب دنيوي و الإنسان الطبيعي السوي أكيد يحب يرتاح و الشخص الأعلى السابق بيضمنلي الراحة لأنه حـيقوم بأدواره على أكمل وجه و أنا حـنقوم بأدواري و مش حـنشيل ليلة مش متاعي ولا نشيل الهم و نقعد نفكر و ندير حاجات المفروض مسؤوليته هو،
فـحنكون مرتاحة.

•الأعلى يكفل لي الأمان لأني حـنكون شايفة إنه يقدر يحل أي شي حتى لو هو مش هكي بس هو في نظري هكي
فـحنقعد مطمنة إنه موجود و نجري عليه لما يصير أي شيء.

•حـنتناقش و ناخد رأي بعض لكن في لحظات حنى الإتنين مش حـنقتنع برأي بعض و الحل ساعتها إني نرجع الأمر ليه و نسمع كلامه
و أنا إنسانة صعبة المراس مانسمعش كلام حد إلا لو توفر فيه شرطين:
-عنده مرجعية دينية فـنضمن إن تفكيره بيخضع لكتاب الله و سنة نبيه في المقام الأول.
-أعلى من دماغي فـنبدا حتى لو مش مقتنعة برأيه لكن واثقة في دماغه في الأساس، فـلو كان قراره صح تمام ولو غلط مش حـنلومه لأني معجبة بدماغه و عارفة إن هدا أقصى شي قدر عليه و إنه ماقصرش.

•القوامة في يد الرجل و أنا الحقيقة ممتنة للقوامة لأن الله كلف رجل بـأمني و أماني و رعايتي و حمايتي و تقويمي
ماعنديش مشكلة في التقويم لأن الإنسان يحتاج لـمن يذكِّره بالله و يمنعه عن الحرام ولا سيما إن كان هدا من زوج محب
لكن القوامة كي تُطبق صح لازم الرجل يكون عنده قدر عالي من الدين و الرجولة و المروءة و الشهامة و الكرامة و كل الصفات الحسنة و لازم يكون عالي و مهيب في عيني عشان نقدر نطيعه في الصالح.

الزواج بالنسبة ليا سيارة راكبة فيها أنا و زوجي
هو سايق و أنا في الكرسي اللي جمبه، هو مركز في القيادة و أنا نشغل الـGPS و نقوله على الاتجاهات لو احتاج مساعدة
لكن هو اللي متولي القيادة
و الزوج الصح بالنسبة ليا هو اللي يخليني فاصلة دماغي و أنا معاه مش مضطرة نخطط و نفكر طول الوقت.

"فـاللهم زوج كما أتمنى و أحب يا الله".
??