أكتوبر الوردي؟
تؤ تؤ معليش الليلة يومنا أخضر🫡💚

الحرب عملت نقلة كبيرة جدا في مجال الصحة النفسية والجيل الحالي كذلك ليه أثر واضح في تطورها وزيادة الوعي بأهميتها والحفاظ عليها.🫶🏻💚

اليوم دا عايزين نشكر فيه كل إنسان خفيف على حياة غيره وكل إنسان واضح في مشاعره وتصرفاته وعلاقاته، وشكرا كذلك لكل إنسان ساعي وجاهد ومعافر عشان يصل لشخصية سليمة ومُعافية وسوية نفسياً، وشكرا لكل إنسان مُراعي لنفسه أولا ثم غيره ثانياً، شكرا لكل إنسان لم يتقمص دور الضحية وساعي انه يحل مشاكله بطريقة متزنة ومنطقية.🫶🏻💚
وشكرا خاص لكل الطاقم العامل في مجال الصحة النفسية من دكاترة وأخصائيين وممرضين وغيرهم، شكرا لعملهم الجاد وسعيهم في تطور المجال وتوعية المجتمع عليه رغم التحديات الفرضها عليهم المجتمع إلا انهم لسه مواصلين في مُشوارهم وسعيهم.🫶🏻💚

وفي اليوم المميز دا حابين نقول ليكم "معليش" لأنه اخر سنة ونص كانت صعبة على كل سوداني سواء داخل أو خارج السودان، حضر الحرب أو ما حضرها، معليش لأنها اخدت مننا كتيرر أحلام وأشخاص وأماكن ومواقف وذكريات، معليش لأنها دخلت جوانا كمية مشاعر سيئة جدا من خوف وقهر وعجز وإستضعاف وغيرها، معليش لأنه حاجات كتيرة حصلت بدون إرادتنا وبدون حول منِّا ولا قوة.

عزائنا الوحيد أنه كل شيء بيحصل لخير وإن كُنا لانعلمه و أننا مأجورون على أحزانِنا، نسأل الله إنه القادم يكون أمن وأمان وسلام واستقرار على السودان وأهله وربنا يصلح حال البلاد والعباد ويرد إلينا وطننا ويعينا على إعادة إعماره وتطويره والنهوض بيه.🫶🏻💚
وكل عام ونحن وإنتوا راضيين عن نفسها بكل عيوبها ومميازتها راضين بي فرحنا وحززنا وضعفنا وقوتنا وساعيين إننا نكون أفضل وأفضل.🫶🏻💚

في الأخير راجع الDM اذا وصلتك رسالة من فريقنا أكتب لينا إحساسك، وإذا وصلتك أكثر من رسالة فأنت متابع ومتفاعل مميز عندنا، وإذا ما وصلتك حاجة فحقك علينا والبوست دا تعويض عن تقصيرنا.👀💚
وشكرا عظيم وكبير جدا لتيم قوم وسامعنك التعبوا في كتابة الرسائل وإرسالها، شكرا لأنهم عملوا الحاجة دي طواعية و بإجتهاد وإخلاص كبيير ونتمنى ليهم كل التوفيق والإحترام والمحبة وربنا يجبرهم زي ما جبروا بخاطر ناس كثيرة اليوم.🫶🏻💚
#سامعنك_للصحة_النفسية
#قوم_أمشي_أقرأ_علم_نفس
#قوم_امشي_اقرا
#تعليمك_لحدي_عندك
#اليوم_العالمي_للصحة_النفسية

مضغوط؟ مبلول؟ والدنيا صعبة؟
نعم نعم يا عزيزي كلنا كذلك🙃
لكن حصل فكرت مرة إنه الضغط ممكن يكون محفّز للإنجاز؟🤔💜

✔️ الضغط هو استجابة الجسم العقلية والجسدية للتحديات الممكن يواجهها الفرد في حياته اليومية، ووممكن يكون الضغط تحفيزي ( أو يوسترس)، ودا البيدفع الفرد للعمل بجدية والتزام لحد ما يصل لهدفه. أما لو شعر الفرد بالإحباط وبإنه ما قادر يواكب متطلبات الحياة والعمل، ففي الحالة دي الضغط بيبقى سلبي أو ضار، ونتيجته الحتمية دوامة من القلق والتوتر والاضطراب النفسي.

⭐ من أكبر العوامل الممكن تساعدنا على تخطي الضغط والصعود على درجات الإنجاز هو استحضار الغاية الأولى من العمل، وتجديد النوايا والسعي والمقاربة بجد وعزيمة💜

كلنا سمعنا الزول البقول "والله أنا ما بعرف اعمل إلا تحت الضغط" أو ممكن نكون نحن الزول دا زاتو، بس فعلاً دي حقيقة✅
لأنه الضغط في ذات نفسه ممكن يكون دافع نحو الإنجاز زي ما قلنا فوق، ودا لأنه بيطلع الفرد من منطقة الراحة فبيخليه يبدع أكتر ويتحرك بفاعلية أكبر نحو الهدف المُحدد.

بس كمان كل ما زاد عن حدّه بينقلب ضده، بمعنى إنه التعرض للضغط بصورة مستمرة ومكثفة ممكن ينتج عنه إرهاق نفسي وجسدي، ودا بينعكس على التراجع في أداء الأعمال، وفقدان الدافع والقلق والتوتر المستمر، الممكن يظهر في شكل انفعالات على النفس أو على المحيط الإجتماعي العام.
عشان كدا مهم جداً التعامل مع الضغوط، وتفريغها بشكل آمن وفي المكان الملائم وبالطريقة المناسبة.
ودا بكون عن طريق تنظيم الوقت، ووضع أهداف واقعية، وخطط مرنة، وتقليل التوقعات، و أخذ فترات للراحة والاسترخاء، ولا بأس في بعض المرات من طلب المساعدة من الآخرين💜

الموضوع ببساطة كدا ممكن نشبهه بحلة "البريستو" أو حلة الضغط، الضغط فيها شيء مهم لنضج الطعام، بس لو زاد شديد ممكن تنفجر وتسبب بلاوي!
عشان كدا مهم شديد فيها فكرة الصفارة والتتفيس بالتدريج.
فخليك حلة "بريستو" في التعامل مع الضغوط.😉💜

واعرف إنه الحياة دي صعبة وضغاطة شديد، لكن كل عسر ينزل على العبد يتبعه التيسير، فهون على قلبك وفوّض أمرك لله.💜

#سامعنك_للصحة_النفسية

ما بين غصة الذنب، ورحلة التوبة نحو السلام الروحي💜

هل الشعور بالذنب شيء جيّد أم سيّء؟
وهل التوبة بتفتح باب راحة وسلام روحي؟🤔
دي أسئلة نجاوب عنّها في المساحة القادمة دي💜

🌼 عقدة الذنب وتأثيره الإيجابي والسلبي:
الشعور بالذنب هي حالة بتخلي الفرد يحسّ بأنه ارتكب خطأ غير مقبول أخلاقياً أو دينياً، وسلوك الفرد بعد الشعور دا ممكن يكون إيجابي أو سلبي.
بيكون إيجابي لو شعر الفرد بالندم وقرّر يصحّح خطأه ويرجع وينوب. لكن لو دخل الفرد في دوامة من الإحباط وشعور بالخزي فدا ممكن يرمي بيه في دائرة من الإضطرابات النفسية.

🌼 التوبة، وسيلة للتصحيح والتعافي:
التوبة بتعني الاعتراف بالخطأ والندم عليه والعزم على عدم الرجوع، ممكن نعتبرها وسيلة تطهيرية تزكوية للنفس والروح.
بتساعد الفرد على التخلّص من شعور الذنب، وبتحرره من قيود السلبية والإحباط، وبتدفعه دفعاً نحو العمل لتصحيح الخطأ، والتعلّم من الأخطاء البيعزز ثقة الفرد في المستقبل.💜

🌼 الصراع ما بين الذنب والتوبة :
في بعض المرات قد يدخل الفرد في صراع بين شعوره بالذنب وعدم قدرته على تركه أو التوبة منه، وبيبقى في حالة من القلق والتوتر المستمر، وفي الحالة دي لابد من التشجيع على التوبة والتذكير بضرورة ذلك، وأننا بشر خطاؤون، وأن الله يغفر الذنوب جميعاً إلا أن يُشرك به💜

قبول الإنسان لحقيقته، وسعيه المستمر لمجاهدة نفسه، وإنابته لله عز وجل والرجوع إليه، وصلته بكل ما يوصل إليه، بيحرر الإنسان من عملقة الأخطاء والركون ليها، وبيخلي الفرد في منطقة سلام داخلي وروحي مع نفسه ومع ربه ومع من حوله من الناس💜

وختاماً، ممكن نتذكر قول النبي صلى الله عليه وسلم فيما يرويه عن ربّه في الحديث القدسي :(قالَ اللهُ -تعالى-: يا ابنَ آدمَ إنَّكَ ما دعَوتَني ورجَوتَني غفَرتُ لَكَ على ما كانَ فيكَ ولا أُبالي، يا ابنَ آدمَ لو بلغَت ذنوبُكَ عَنانَ السَّماءِ ثمَّ استغفرتَني غفرتُ لَكَ ولا أبالي، يا ابنَ آدمَ إنَّكَ لو أتيتَني بقِرابِ الأرضِ خطايا ثمَّ لقيتَني لا تشرِكُ بي شيئاً لأتيتُكَ بقرابِها مغفرةً).💜

#سامعنك_للصحة_النفسية

فضفضة...

بيتقال إنه ماف لوم إلا من بعد محبة...?

بس في رآيك.. هل الشخصيات البتلوم في الفاضي والمليان، هل بتستحق نتجاوب مع اللوم ده، ونعتذر عن تقصيرنا تجاههم؟

رآيكم بيهمنا...?

#سامعنك
#الصحة_النفسية_مُبتغانا

زاجل سامعنك

أيا رفيق، في هذا المساء...?

إنت البتتعب، وإنت البتجتهد، إنت البتزهج في نُص الطريق
إنت البتحرق نفسك عشان تضوِّي وتنجح، وإنت البتسعى
إنت البتحارب في المعارك بتاعتك ماف زول غيرك...

الناس بس بتشوف لحظات نجاحك، ما بتشوف إنت إجتهدت قدر شنو، وتعبت قدر شنو...

عشان كدا إجتهد وعافر عشان نفسك، عشان إنت بتستاهل النجاح؛ لأنه إنت بتشبه النجاح والنجاح بيشبهك...?

لو بديت تحقق جزء من إنجازاتك ولسه ما خلصت ويادوبك كنت في بداية الطريق، هل بتحتفظ بإنجازاتك لنفسك، ولا بتوري بقية الناس؟?

شنو هو قضاء الحوائج بالكتمان؟
وليه النبي ﷺ وصانا إنه نقضي حوائجنا بالكتمان؟
تحبوا نعرف مع بعض؟ يلا نبدا...??

إنك تقضي حوائجك بالكتمان معناه إنك تعمل أي شيء من غير ما كل الناس تعرف، أو ممكن توري زول أو إتنين من الناس الإنت بتثق فيهم?.

وليه نقضي حوائجنا بالكتمان؟

● إنك تتكلم عن مشاريعك في العلن بيديك نوع من أنواع الإنجاز، وإنت بتشوف الناس منبهرة بكلامك ومُخططاتك، وإنك وصلت قمة الإنجاز بس للأسف في الحقيقة بتكون يادوبك في بداية الإنجاز وقد تحس بإنك ما محتاج تنجز أكتر من كدا وقد تسوف كل شغلك وإنجازاتك، مع إنه إنت محتاج إنك تنجز أكتر وبالصورة دي حتخسر؛ عشان كدا خليك حذر?.

● الخيبات في العلن موجعة أكتر من خيباتك مع نفسك، حاول دايمًا خلِّص إنجازاتك ومشاريعك كلها، واصل وعافر، وأبهر الناس بالنتائج الحلوة في النهاية??.

وبس كدا.. إتفقنا يا رفيق؟...?

#سامعنك_للصحة_النفسية
#صحتك_النفسية_مُبتغانا

كيف نقوي صحتنا النفسية؟

في المرة الفاتت عرفنا الهشاشة وقلنا إنها:
(هي مشاعر سلبيه بتسيطر عليك و بتدمر نفسيتك بتأثر علي شخصيتك بتخليك شخص ضعيف داخلياً).

طيب الحل شنو؟
• أول الحاجات المفروض تعملها عشان تقوي صحتك النفسيه هي علاقتك مع ربنا لازم تقويها و تتقرب من ربنا?.

• قيام الليل سحر حقيقي و راحة ما بعدها راحه ما زول بيعرفها إلا الجربها...
و لاحظ أي شخص حولك ناجح و ربنا صابي ليهو الرزق صب لاحظ علاقته مع ربنا و حتلقاه ملتزم بقراءة القرآن بالذات سورة البقره و قيام الليل.

• لازم تتواجد في بيئه صحية... حولك عشان حياتك حتكون صحيه و ساهله بعيده عن الناس المؤذية.

• خلي دائما الشخصيات الفي حياتك تتساهل وجودك في حياتهم... و تكون "علاقات مريحه" بعيده عن الأذى النفسي و العتاب المستمر و المشاكل.

• حل مشكلاتك و اتخطاها حل جذري و نهائي بدون ما ترجع ليها تاني.

• ما تهرب من مشاكلك واجهها حلها، و ما تهرب من مشاعرك شوف سببها شنو وحلها و اتخطاها أول بأول عشان ما تتراكم.

• ما تتردد تطلب المساعده إذا احتجت ليها من الأشخاص القريبين ليك عشان ده حيفرق جدًا في صحتك النفسية?

#صحتك_النفسية_هي_مبتغانا
#سامعنك_للصحه_النفسية

لو ما بتقدر تواجه مشاكلك ولا صعوبات الحياة وبتنهار مع أول مشكلة معناها دي
هشاشة نفسية...

طيب شنو الممكن يوصلني المرحلة دي؟

▫️الكتمان الشديد وعدم التفريغ المستمر وتبيين نفسك قوي وما تصارح نفسك إنك ممكن عادي تضعف وتنهار في لحظات.

▫️تراكم مشكلة على مشكلة وما تفرغ طاقتك.

▫️تكون في بيئة تحسسك إنك ما محبوب.

فتعال نوريك كيف تقوي صحتك النفسية?

صحتك النفسية هي مبتغانا
#سامعنك_للصحة_النفسية.

قال أحدهم ذات مرة : "لا أملكُ رفاهِية الانهيَار! أنا مُجبر على تجاوُز كلّ هذا "

بس هل المفهوم دا صحيح؟?
هل فعلاً نحن ما بنملك رفاهية الانهيار؟! وليه اقتنعنا بكدا؟

تعالوا نسمع من بعض?

#صحتك_النفسية_هي_مبتغانا
#سامعنك_للصحة_النفسية

هذا الصباح?

ما تستسلم!
أنت وصلت لمكان في شخص غيرك بجاهد عشان يصل ليه، والفرص الفي يدك هي حلم لشخص تاني، خليك مؤمن بنفسك وبقدراتك وصدقني حتوصل?.

#زاجل_سامعنك
#صحتك_النفسية_هي_مبتغانا
#سامعنك_للصحة_النفسية