. قصیدة:گمر عباس
ــــــــــــــــــــــــــــــــــــــــــــــــ
گمر عباس ضیائه أیلالي
گمر عباس عـلي یحلالي

گاعد أبصدر السمه
گـمر حمـّاي الحـمه

گمر عباس علي یحلالي
ـــــــــــــــــــــــــــــــــــــــــــــ
من فتح عینه..و أهله مسروره
السـمه النـزلت...ضـلّت أتـزوره
حگها لن شافت...منّه هالصوره
الگـمـر کامـل....کـاشـخ أبنـوره

لزمـت أیـده و خذته أویاها
حتیٰ یعکس ضواه بضواها

وجها ضاوي أبمبسمه
گـمر حمـّاي الحـمـه

گمر عباس علي یحلالي
ـــــــــــــــــــــــــــــــــــــــــــــ
بالسمه أنفرشت..سفرة المولد
وحیدر اللیله...أبفرحته أمعیّد
بسم ابوالغیره..کل نبـي أیردد
مـن جـمال الله...وجـها لمـورّد

عیـنه ماطاحت أمن أصیاره
صوب الحسین یدیر أنظاره

أشگد یحب أیکلّمه
گـمر حمـّاي الحـمه

گمر عباس علي یحلالي
ـــــــــــــــــــــــــــــــــــــــــــــ
سولفت زینب..عن مواصیفه
یرفع أچفوفه...الها من کیـفه
تـزعل أعـیونه...لمٌـن أتعـیـفه
و یبتسم الها...لو دنت سیـفه

أمن الطفوله و نظرته أثگیله
یسـکت الزینـب أمن أتشـیله

أیحبـها من أتحزّمه
گـمر حمـّاي الحـمه

گمر عباس علي یحلالي
ـــــــــــــــــــــــــــــــــــــــــــــ
عنـده وي أمّـه...هـالولد غـایه
أتـگله یـولیدي..کض الحچایه
خـلّي لـعیونک...زیـنب أمـرایه
وللحسین أفدي..نفسک اهوایه

یبني عباس رضعتک غیره
حتیٰ حلمي اتعرف تعبیره

زودک الله أمـقدّمه
گـمر حمـّاي الحـمه

گمر عباس علي یحلالي
ـــــــــــــــــــــــــــــــــــــــــــــ
خادم الحسين

يمن حبه ملكني ومسكنه بكلبي
للدنيه مجيئك نعمه من ربي
سعيد ومبتهج من فرحتي وحبي
وتهلهل روحي ومسروره

الصحابة تعنوا الدار الكرم والجود
مسرورين راحوا شايلين أورود
صاحوا ياعلي عالخير بالمولود
عيدنه اليوم بميلاده

أبو ذر الغفاري كله ياسلمان
اليوم آنه سعيد ومن صدك فرحان
أحس أبهالولاده معيده الاكوان
وتنادي مبارك ياحيدر

بشهر الطاعه يشبع كل فقير ومايظل جوعان
شهر الخير نعمه صار شهر الكرم والاحسان
لأن الحسن راعي الجود ميلاده بشهر رمضان
رمضان اتربه أعلى أطباعه

سلام المشعل

https://t.me/amaomi

قصیده في حق ولادة الأمام الحسن المجتبي علیه السلام????????

انولد هالیوم مُعز المؤمنین
فرحه لصحاب العبه  سطع نور المجتبه

ابشهر رمضان سطع... نور القداسه الأکبر
کوکبه   ایشع   بقه.. و اعله العوالم  یزهر
الهادي ثغره ابتسم.. ابجیة الحسن استبشر
و الملائك    اجت.. هنو  الزهره  و    حیدر

الحسن  نوره  سطع  عالمشرقین
یحمل احروف الأبه     سطع نور المجتبه

الحسن هاذه صبح.. مثل  الشمس  عنوانه
لبس  تاج  الشرف... واعله العرش برهانه
ثاني   حیدر  علي.. ظل    بالعدل  میزانه
الحسن معنه الکرم... ما ینحصي  احسانه

نبي   و شایل  صفات  المرسلین
یشع بالحق کوکبه       سطع نور المجتبه

بدر  و  ایشع  بقه.....عالجنه   هبت  نفحه
نزل  یمه   الوحي.. و ایهزله مهده ابجنحه
ابنوره تزهي الأرض..عالدنیا  أشرق  صبحه
الورد  ینثر   عطر...ما  تنوصف   هالفرحه

الحسن  نوره سطع فوگ الجبین
عالي ظل بالمرتبه      سطع نور المجتبه

العصمه بیه  انوجد..  یتساطع      ابأنواره
ابشخصه رب العرش.. جاعل جمیع أسراره
بالمدینه        أنولد... من الجنه کل أثماره
الحسن   یشبه علي.. معروفه  کل  أدواره

الکرم  ینبع   بقه   من  الأیدین
ماکو غیم الیحجبه     سطع نور المجتبه

الحسن کعبه صبح.. طافت علیه الأرواح
ابنصف رمضان اجه... نحییها هاي الأفراح
و   الهزاري   هتف.. بنغامه  صایر    صداح
و الخمیله    العطر.. فوگ  المهد  ظل  فواح

الصعب  یمه  یجیله و یستعین
ابکل وکت ظل یکتبه    سطع نور المجتبه

لخادم الحسين علي فلاح الواسطي
13رمضان
1445

یزوّار الحسـن ویـاکم أخـذوني
ـــــــــــــــــــــــــــــــــــــــــــــــ
یزوار الحسن یا محله هلیله
حفلنه بالبقیع ایصیر ترتیله
نبارک للنبي الهادي و نهنیله
ابنص رمضان ابارکله ابضوه اعیوني
یزوّار الحسـن ویـاکم أخـذوني
ـــــــــــــــــــــــــــــــــــــــــــــــ
ابنص رمضان اگرگع واعقد المحفل
قرة عین هادینه ابسبط لأول
هلیله ابجماله البدر یتعدّل
ساحرني جماله و سبّب اجنوني
یزوّار الحسـن ویـاکم أخـذوني
ـــــــــــــــــــــــــــــــــــــــــــــــ
یحن گلبي البقیع الحسن وانواره
کریم و بـالگبر مایرد خطّاره
نص رمضان حلوه یمّه لزیاره
ازورن تربته مشتاگ تدروني
یزوّار الحسـن ویـاکم أخـذوني
ـــــــــــــــــــــــــــــــــــــــــــــــ
نص رمضان من ربک خلق نوره
من وجه الحسن ضاءت المعموره
گرگیعان عید الوصي و دستوره
آخذ من علي عیـدیّه خلــوني
یزوّار الحسـن ویـاکم أخـذوني
ـــــــــــــــــــــــــــــــــــــــــــــــ
کلمات خادم الحسین ع
عبدالامیرالناصري

https://t.me/amaomi

قصیدة:#گرگیعان
ـــــــــــــــــــــــــــــــــــــــــــ
گرگیعان و گرگیعان..بین أقصیّر ورمیضان
عادت علیکم صیّــام..کل سنه و کل عام

بسم الحسن لا غیره
جیناکم یأهل الدیره

نص الشهر گرگیعان
ـــــــــــــــــــــــــــــــــــــــــــــ
بسم الحسن جینه ابگلبنه الصافي
هلیله بدروب الولایه أنوافي
صوت الهله من گلبي یطلع دافي
مو حلوه هلیله المحب متجافي

ماجینه یا ماجینه..لو ما الحسن ماجینه
حلّو الجیس وعطونه..الباب الحسن ودّونه

خل یعطینه من خیره
جیناکم یأهل الدیره

نص الشهر گرگیعان
ـــــــــــــــــــــــــــــــــــــــــــــ
بیت الکـرم کلها أتعرف عـنوانه
تمطر سحاب اچفوفه من احسانه
هـذه الي فــاتـح للیـمر بـیبـانه
أبـن الکــرم ربّـک یعـظّم شـانه

یأهل السطوح تنطونه لو أنروح

تعطونه لو نعطیکم..بیت مکه انودیکم
هاي مکه المعموره..مبنیّه جص و نوره

نعرفکم أهل الغیره
جیناکم یأهل الدیره

نص الشهر گرگیعان
ـــــــــــــــــــــــــــــــــــــــــــــ
هلـیله أطفال البـلد مـسروره
سفرة ولاده و عالأرض منشوره
کلمن وجیسه وکشخته وأعطوره
یـوم الحسـن یتـبارکون أبـنوره

الله أیخلّي راعي البیت..عالبسبوسه والچکلیت
یارب سلّم ولـدهم..کلشي ناخذ من عدهم

عدنه چفوف أزغیره
جیناکم یأهل الدیره

نص الشهر گرگیعان
ـــــــــــــــــــــــــــــــــــــــــــــ
سلّـم ولـدهم یالله خله لأمه یالله
احفظ طفلهم یالله خله لأمه یالله
هوّه و خواته یالله ابکل حیاته یالله
طوّل عمرهم یالله والیمرهم یالله
ــــــــــــــــــــــــــــــــــــــــــــــ
یاربي خلّي الفـرحه تمـتد بینه
ومن الکـرم أترسها هاي ایدینه
أحـفظ بلدنه وکلمـن أیخاوینه
کل عام و هالفرحه تعود اعلینه

کل عام أنصیح ابرمضان..نص الشهر گرگیعان
اعطونه من حق الله...والـرازق هوّه الله

مانگطع های السیره
جیناکم یأهل الدیره

نص الشهر گرگیعان
ـــــــــــــــــــــــــــــــــــــــــــــ
کلمات خادم الحسین ع
عبدالامیرالناصري,, المحمره

قصیدة:ماجینه
ــــــــــــــــــــــــــــــــــــــــــــ
شبّـر محمد هذه میلاده
لیله سعیده لیـلة أعیاده

ماجینه یاماجینه..لو ماالحسن ماجینه
لیله سعیده لیلة أعیاده
ــــــــــــــــــــــــــــــــــــ
هلیله بضعة محمد،هنّـوها عدها ولد
مثل البدر بالمهد
صار الحسن وابجماله،حیدر تباها وشهد
دیوانـه لا ما برد

قـرّة عیـونه بالحسـن حیــدر
نظـرة جـماله بالبشـر تســحر

نص الشهر من رمضان..گرگیعان و گرگیعان
لیله سعیده لیلة أعیاده
ــــــــــــــــــــــــــــــــــــ
شامة جماله اعله خده..نقطه ابأسم فاطمه
هز مهده حامي الحمه
من زغره دیوانه مهده،وأیرحّب أبمبسمه
ضیـوفه طیور السمه

هلگد جمیل و حلوه اوصافه
یسـحر عیـونه کلـمن الـشافه

سلّم ولدهم لأمه..یاربي خلّه لأمه
لیله سعیده لیلة أعیاده
ــــــــــــــــــــــــــــــــــــ
کل الفضایل تباهت،لأسم الحسن تنتمي
طبعه سخي الهاشمي
جود و سماحه و فراسه،من والده یحتمي
نبـض الگـلب فاطـمي

طبـع الیـعزّب یکـرم ابأیده
خلّف علي واشیطلع اولیده

دلّـونه بیه دلونه..حلّو الچیس واعطونه
لیله سعیده لیلة أعیاده
ــــــــــــــــــــــــــــــــــــ
قارن صفات المکارم،کلها اعله طول الزمن
تلگاها بس بالحسن
راد الصلح حتی یسلم دین النبي المؤتمن
هیچ الصمت بیه ثمن

صـح ما تبـادر بالحـرب ســیفه
بس سیفه یشطر لو جبل ضیفه

تعطونه لو نعطیکم..بیت مکه أنودیکم
لیله سعیده لیلة أعیاده
ــــــــــــــــــــــــــــــــــــ
کلمات خادم الحسین ع
عبدالامیرالناصري..المحمره
# رمضان

https://t.me/amaomi

قصیدة:زیارة البقیع
ــــــــــــــــــــــــــــــــــــــــــــــ
یاصوب المدینه   دلّــوني علیها
راید هالبشاره..مشتاگ الزیاره
ــــــــــــــــــــــــــــــــــــــــــــــ
کاتلني الحنین..بیمن أستعین..تعبتني السنین..محّد یستجیب
شوگي بالدلیل..ثابت ما یمیل..بس راید سبیل..اوصل للحبیب
اتمنه الوصول..یم گبر الرسول..اسئل عالبتول..بحساسي الغریب
انظر من بعید..گلبي مایهید..اوصلهم ارید..شیبني النحیب

انفاسـي رهـینه   محّد یشتریها
یاهو العنده چاره.مشتاگ الزیاره
ــــــــــــــــــــــــــــــــــــــــــــــ
باب الله الوسیع..بتراب البقیع..خایف لا أضیع..ویتیه المسیر
اتمنه جناح..عندي وکل صباح..اشهگ بالرواح..یمهم کون اصیر
اشتم بالتراب..شو طال الغیاب..ما احمل عتاب..حایر بالضمیر
مشتاگ ارد اطوف..وحضن بالچفوف..تربه و بیها اشوف..صوره امن الأمیر

وین اللّه و نبینه   هالبقعه نجیها
گلبي تدوي ناره..مشتاگ الزیاره
ــــــــــــــــــــــــــــــــــــــــــــــ
ابدي بالسلام..من ثاني أمام..وابگلبي هیام..ما حبّـن سواه
للحسن اروح..وانساها الجروح..لو عطره یفوح..انسه ابگلبي آه
للسجّاد اگوم..یم گبره احوم..عندي أحله یوم..لو أگضيه معاه
وللباقر أصیر..خادم مستجیر..خل عیني تدیر..دایم یم ثراه

آهـاتي الحــزینه   یمهم ارتجیها
لاگبه و مناره..مشتاگ الزیاره
ــــــــــــــــــــــــــــــــــــــــــــــ
راسم بالضنون..صوره للعیون..للصادق یکون..حضره و بیها باب
یم اربع قبور..چن واگف ازور..وابگلبي تدور..دعوه و تستجاب
وأگصد بالحنین..یم أم البنین..ابچي اعله الحسین..وافراگ الشباب
ابچي اعله الکفیل..سوه المستحیل..ما مثله مثیل..للخوه یُـجاب

هلیــله اندعینــه  والدعوه بیدیها
مارید الخساره..مشتاگ الزیاره
ــــــــــــــــــــــــــــــــــــــــــــــ
کلمات خادم الحسین ع
عبدالامیرالناصري...المحمره
#رمضان

https://t.me/amaomi