حسين يالحزنك يعيش ويانه
ويه مسره الـــدم سره بدمانه
=================
ســـره بالدم حزنك الماله مثيـــل
نمسي بالدمعــــة ونصبّح بالعويل
يالهويت اعله الرمل دامي وجتيل
و السمـــــه كَبل الارض حزنانـــه
===================
عليك حزنت سيدي ارض وسمه
نشوف كل مغرب اثر من  الدمه
لغـــــز انته و ماكو واحــــد يفهمه
يالـمـغـيّــر للفجـــــر ألـــــوانــــــــه
=====================
يالمتت ضامي اعله راكَ العلكَمي
يالصحت للسيف اشرب من دمي
يالكَلت لجيــــوش أمية اتزاحمي
ابـــــد ما أركـــــع لابن مرجانــــه
====================
حين نال السيـــف منك و انتهيت
دامـــي عالتربان وا لهفـــي بقيت
الميـــت ايدفنونه و انته اتسلبيت
وتنزف اعله الغبرة جثتك النحلانه
=====================
يا نحيل الجسم من كَـــــد النزف
و العطـــــش خله رسومك تختلف
ألضمه و السيف ياهو اكثر صلف
و ياهـــــو اكثر عـذبــــك مولانــه
====================
يومـــــك الما مثله صار و لا جره
يجـن عقلـــــه الراد بس يتصوره
شلون ابن النبي و ينحــز منحره
وانطحــن جسمه و سبوا نسوانه
====================
انته يالجرحك فلا مثله جرح
راسك القرآن و انشال برمـــح
يا شبيه النبي يحيـــى بالذبح
الواحد شيحجي يحير لسانه
====================
ساعد الله المهدي ابوالكَلب الكسير
مشهد الطـــــف يمه يومية يصير
يشوفه وحده بكربلا و ماله نصير
ويمه اهله مذبحـــــه و خـوانــــه
====================
حسن بشير السوداني

الليلة كل احنه يتامه صفينه
نصيح واويلاه يا والينه

وداع اخير وياك هاي الليلة
ياعلي وكَلب السمه نهد حيله
الليلة لمصابك دمعنه نسيله
مو دمع نبجي دمه خلينه

تصيح ياحيدر الليلة احبابك
كلنه ايتام ووكَفنه ابابك
حته شهر الله انفجع بغيابك
الليلة كل عاشك دمعته بعينه

مثلما جبريل طر صوته السمه
انطر كَلب كل شيعي ياحامي الحمه
ينحب المحراب ودموعه دمه
فاكدك ويصيح حيدر وينه

علي يالفكدك عله احبابك صعب
السيف انته بسيف عجبه تنضرب
الما كدر يوصل الراسك بالحرب
صوبك وكت الصلا بيمينه

يالحملت الدين واسرار الكتاب
ياوسف حملوك هالليلة الاحباب
انته ابو تراب وعفه يضمك تراب
ريته ينظر حالتك هادينه

ريته ينظر حالتك طه الرسول
شيحجي يالكرار هالليلة شيكول
ثبتت بيديك للدين الاصول
بالنعش وسفه علي مخلينه

حسن بشير السوداني

اكبر فرحة عندي   بميلادك يمهدي

ابعث تهاني     واحله الاماني
للهادي هاليوم   كلبي خذاني
وإلنقطة الباء   وسبع المثاني
ومهدي يمهدي   يلهج لساني
يادمعاتي ردي   بميلادك يمهدي

لباب الكرم جيت   بهالفرحه هنيت
ومولاي الحسين    جم فرحه وديت
نوب لعلي خذيت   وجم وردة طشيت
وللباقر الصوت     بهالفرحه  ناديت
جددته عهدي    بميلادك يمهدي

ولصادق الآل    افراحي مرسال
وبين الجوادين   جفي ورد شال
مابين الآمال    ووعده الذي طال
أتأمل يعود      ويتحسن الحال
صوت الفرحه يحدي    بميلادك يمهدي

دلالي بافراح     صوب الرضا راح
وللعسكريين      صوت الفرح صاح
باقات الورود     لو عدهن جناح
بسامرا هاليوم    تنزل بالافراح
منها البشرى تبدي    بميلادك يمهدي

بصوت السعادة    دلالي ناده
ياشيعه مبروك     بهاي الولاده
بارينه راده          منقذ عباده
هم يرجع بيوم     يحقق مراده
وانه هذا وعدي    بميلادك يمهدي

حسن بشير السوداني

صوت من الكَلب صاح
أهلا شهـــــر الأفـــراح
ــــــــــــــــــــــــــــــــــــــــــ
هل شهر الفرح واعياد أئمتنه
عند الله اشكبرها هايه لمتنه
خل نفرح وخلها تدوم بسمتنه
لاهل البيت ماتنوصف فرحتنه

شهر ايداوي الاجراح
اهلا شهر الافـــــــراح
ــــــــــــــــــــــــــــــــــــــــــ
بحسين الولي اول فرح يبدي
ويوم اخمسطعش نختمها بالمهدي
من الذر عشكَت احسين وبمهدي
وبالمحشر اهناكه غيره ماعندي

وجه ابن النبي لاح
اهلا شهر الافـــراح
ـــــــــــــــــــــــــــــــــــــــــــــــــ
رابع يوم مولد صاحب النخوة
من مهده نشمـــــه عطر المروة
ربّـــا حيدرة عالوفه و الخـــوة
الماصدكَ يشوفه بكربله شسوه

عطر المرجلة فاح
اهلا شهر الافراح
ــــــــــــــــــــــــــــــــــــــــــ
مزدهرة ومضيئة الدنيه ومنوره
للسجاد هالليلة صفت كَمره
احله من الكَمر واجمل عطر عطره
يافرحة حسين ابثالث العترة

هالليلة الحزن راح
اهلا شهر الافراح
ــــــــــــــــــــــــــــــــــــــــــ
بوجه حسين من اشرق علي الاكبر
كل الكون من شبه النبي اتنور
بليلة مولده كربلا تتبشر
وجه المصطفى بشوفته نتذكر

حسنه ياخذ ارواح
اهلا شهر الافراح
ــــــــــــــــــــــــــــــــــــــــــ
من اشرق المهدي وعالارض بّين
نجمات السماء ابجيته فرحن
اول فرحة والله بهالخبر اعلن
افراح المحب من يضهر يكملن

جبريل اله مداح
اهلا شهر الافراح
ــــــــــــــــــــــــــــــــــــــــــ
حسن بشير السوداني

شهر الفرح من جانه
نثرت ورود اسمانه

شهر السعاده اهلاله
بس الفرح يحلاله
صوت السمه يتعاله
كلها صفت فرحانه

لحسين هاي افراحنه
وطابت جميع اجراحنه
بمولد حبيب ارواحنه
عم الفرح دنيانه

ليل اربعه لعباسنه
بالشدة يرفع راسنه
كل احنه هذا احساسنه
يا بالفضل مولانه

السجاد هل ميلاده
يامحله هاي اعياده
طول الدهر امجاده
عاشت افضاله ويانه

زهرة عطر نهديها
للاكبر انوديها
ليلى نجي نهنيها
نهدي الشعر وألحانه

بمولد المهدي الغايب
نحضر ونفرح واجب
يوم الضهور انراقب
يصير العدل عنوانه

حسن بشير السوداني

مارديـــــــت   مو طاحت جفوني
وحشه البيت    ياضـــوه عيوني
      مارديت  ... يايمه     وحشه البيت يايمه
===============================
ام البنين ام الحـــــــزن   صار اسمي عكب اغيابك
وشكد بجيت لفركتك     وشكد نحت يم بابك
كل لحظة اصدن عالدرب    هلبت ترد لحبابك
ومن كثر ما اتنطرك       طاح النظر باعتابك
شكد اتريد   تبتعد واني
انته بعيد   و انه بحزاني
شكد ناديت يايمه         وحشه البيت يايمه
===============================
ما همني عندي اربعة   وكلهم مشوا عن عيني
بس انته يالهجرك جبل    فوك الكَلب ياذيني
سهرانه العيون وردت      واحد يجي يواسيني
غير الهوى العل باب ايمر   محد اجه يسليني
عكب الراح    من يدكَ بابي
كلبي صاح     راحوا احبابي
ماضليت  يايمه      وحشه البيت  يايمه
=======================
أم اليروحلها ولـــــــد    اهل السلف يلفنها
يصبرنها عالراح ويجن    بفراكَه و يواسنها
بس انه ما وحده لفت     و لا حالتي الشافنها
ياهي البعد عندي وتمر    روحي ابهظم عافنها
زينب وين    خل تواسيني
يمه حسين     ياهي تلفيني
شكد حنيت   يايمه       وحشه البيت يايمه
=======================٠
نسوان هاشم بالضعن     كلهن مشن يالغالي
ضليت وحدي وحايرة     وبس الحزن يبرالي
بس العليلة ومثلي هم    حالتها تشبه حالي
تسألني عنك كل وكت     يجاوبها دمعي الهالي
راح الجان    سلوة اسنينج
بالاحزان      صرتي وونينج
ترجع ريت  يايمه      وحشه البيت يايمه
=======================
ماميز الصبح ومسى    مثل الحبيس المسجون
من كثر ما دمعي جره    ماظلت اعلية اعيون
بين الدعى وبين الرجه    بلكت الراحوا يلفون
ازرع طريق الطف ورد    لو كالوا اهمه يرجعون
والمهموم   يحسب احسابه
يفرح يوم   رجعة احبابه
شكد تانيت  يايمه     وحشه البيت يايمه
=======================
حسن بشير السوداني

سيدتي ... أم البنين

باب الحوائـــج إنتي للناس
فضّلج ربنه وصرتي مقياس
أول مره ضحت للحسيــــن
وغيرج منو الجابت العباس
انطيتي اربعه .... لعين الحسين
سيدتي ... أم البنيــــــن
==================
عندج مقام شكبره بالكون
بي تعترف حتى اليكرهون
ياخير من اختار ابوحسين
وخليتي ولده ابين العيون
منج خذو .... حب وحنين
سيدتي ... أم البنين
=================
صرتي ملاذ لعلي وحسين
يا حرة مثلج تنوجد وين
فضلتي ابواليمه عله الاولاد
وما كلتي انه موفيه الدين
ومقصرة ... ويه الحسين
سيدتي ... أم البنين
=================
بكَدما بجيتي حسين بدموع
للشِعر حزنج صار موضوع
كل دمعة من عيناج ديوان
كل ونة ناعي بصوت موجوع
منبر حزن ... طول السنين
سيدتي ... أم البنين
=================
يالما حضرتي بيوم عاشور
بارض المدينة ابنيتي الكَبور
منبر نصبتي و بيت احزان
وعمرج كضيتي بكلب مكسور
دمعه وحزن ... لوعة وونين
سيدتي ... أم البنين
==================
جازاج ربنه ابيا مجازات
للبشر صرتي باب حاجات
ماتت الحرة وجانت تكول
المات اعله حب حسين مامات
يوم الحشر .... عالي الجبين
سيدتي ... أم البنين
==================
سيدتــــــي و اليوم جيناج
بجاه الوصي وحسين ننخاج
كلبج حنين وطيبة الاوصاف
لا مــــــا يخيب اللي تعناج
مديت الج .... هاي الادين
سيدتي ... أم البنين
==================
حسن بشير السوداني

آه واويلاه يا أم البنين

الليلة لام عباس مرفوع الدعه
كلمن يناديها صوته تسمعه
نطت لاجل حسين شبان اربعه
ضحت بأولادها   لاجل عين اسيادها
ارتفعت بأفعالها     للثرية أمجادها
ضحت بأربع ولد لاجل الحسين
اه واويلاه يا ام البنين
=====================
الليلة باسم ام البنين الطاهره
عدها شان اشكبره يم رب الوره
لبوة هية وعاشت ابظل حيدره
عالوفه رباها    وغيره منه انطاها
هيبة من واليها   السيدة سماها
رضّعت اولادها الحب والحنين
اه واويلاه يا ام البنين
====================
مثل ما بات الوصي ابدال الرسول
باتت اعله افراش محبوب البتول
جن علي للهادي جانت خل نكول
لو سألها شلونها    يجري دمع اجفونها
والخجل كدامه     يظهر اعله اعيونها
يم أبو السجاد ما ترفع جبين
اه واويلاه يا ام البنين
========================
مثل ما حيدر لابو الزهره ظهر
ظهر جان وعون لحسين الكمر
زينب اتناديه عباس الفخر
تفتخر بوجوده     من تعاين جوده
يكَلها فدوه لخدرج   كافلج وزنوده
يا ثلث تنعام من ليث العرين
اه واويلاه يا ام البنين
=======================
يا مقام العدها من رب السماء
ماترد حاير رفع جف الدعاء
ندري تحضر بالمجالس والعزاء
تلطم اعله الهامه    هيه وي خدامه
بالمجالس تحضر    تساعد اللطامه
تسجل اسماء الخدم والقائمين
اه واويلاه يا ام البنين
====================
من يهل عاشور توصل كربلا
توزع الماي ابمدامع هامله
تصيح اشرب ماي والعن حرمله
بكربلا بأحساسها       تنعه خيرة ناسها  
ساعه يم احسينها   وساعه يم عباسها
تكَظي كل عاشور بين الحرمين
اه واويلاه يا ام البنين
===================
حسن بشير السوداني