Obodonlashtirish boshqarmasi boshlig’i chiqindini belgilanmagan joyga joylashtirgan xodimini lavozimidan ozod etdi

Ijtimoiy tarmoqlarda “Chiqindi poligoniga yetib bormadimi yoki erindimi?”, mazmunidagi xabar boʼyicha Toshkent viloyati Ekologiya boshqarmasi Oʼrta Chirchiq tumani boʼlimi inspektorlari tomonidan joyiga chiqib oʼrganildi.

Oʼrganish davomida Oʼrta Chirchiq tumani Obodonlashtirish boʼlimi haydovchisi X.А. ish jarayonida hosil boʼlgan chiqindilarni tumanning Doʼstlik MFY hududiga oʼziga biriktirilgan avtotransport vositasida belgilanmagan joyga olib borib toʼkkanligi aniqlandi. Mazkur holat boʼyicha inspektorlar tomonidan Obodonlashtirish boʼlimi haydovchisi X.А. va tashkilot masʼullari oʻrtasida tushuntirish ishlari oʼtkazildi.

Oʼz vazifasiga masʼuliyatsizlik bilan qaragan va atrof-muhitga salbiy harakati bilan zarar yetkazgan haydovchi bilan tuzilgan mehnat shartnomasi viloyat Obodonlashtirish boshqarmasi boshlig’ining tashabbusi bilan joriy yilning 27-may kunidan Oʼzbekiston Respublikasi Mehnat Kodeksining tegishli moddalariga ko’ra bekor qilindi. Shu bilan birga unga nisbatan MJtKning 91-prim 1-modda 1-qismi bilan maʼmuriy bayonnoma rasmiylashtirildi va jarima chorasi qoʼllanildi.

Oʼz oʼrnida aholiga eslatib oʼtmoqchimiz! Belgilanmagan joylarga chiqindi tashlash va uni yoqqanlarga qonunda tegishli tartibda chora koʼrilishini unutmang.

✍️Toshkent viloyati Ekologiya boshqarmasi Matbuot xizmati