🛑
العاشرة صباحا بتوقيت بوسطن
ترامب رئيسا لأمريكا

عام 2016 بلشت دراسة بالسنة التانية طب بشري
بوقتا استلم ترمب وبعد أشهر أعلن حظر دخول مواطني عدة دول من بينها سوريا للولايات المتحدة الأميركية.
استمر هاد الحظر فترة رئاستو كاملة.
التأثير الي صار حسب ما سمعناه وعشناه.
1. كل الفيز بغض النظر عن نوعها صار من الصعب جدا الحصول عليها، وقلت من الصعب جدا وليس مستحيل لانو في تجارب فردية وقليلة جدا جدا جدا نجحت بتحصيل الفيزا بعد عدة محاولات وأشهر من الانتظار

1. استقدام شخص من الأهل أيضا صار صعب جدا ومستحيل (مابعرف حدا قدر)

2. وجود جنسية تانية لدى المتقدم قد يسهّل بعض الإجراءات ولكن مجرد انك جاية من سوريا كانت علامة حمراء.
   (طبيب سوري لديه جواز بريطاني وكان في زيارة الى كندا لبيت حماه، ووقت الي قابل بجوازه البريطاني الي فيو مواليد سوريا انحط عالاجراءات الادارية 3 أشهر وكان رح يروح عليه مقعد الاختصاص).

الامثلة كتيرة

والحالات الفردية قليلة جدا ولا تبنى عليها قاعدة.

أكتب ما سبق لأنصح من يريد السفر لأمريكا بعد التخرج بما يلي:

1. إذا كنت طالب في السنوات الثلاث الأُوّل كمل طريقك مارح يختلف عليك شي.
   هنن 4 سنوات بتكون خلصت فيون امتحاناتك واشتغلت ع حالك عسى الله أن يحدث بعد ذلك أمرا.

2. اذا كنت في السنة 4 وماعندك مشكلة انتظار بعد التخرج سنة او سنتين كمان كمل بطريقك ودراسة امتحاناتك.

3. اذا كنت في اخر سنتين أو بالتحديد آخر سنة وكنت ماشي بالطريق ف خلّص الي ماشي فيه(اذا رايح تخلص تحضير ل الستيب، قدمو وحطو بجيبك لا توقف بنص الطريق) ولكن! أنصح جدا بإنك تحط خطة بديلة اذا كانت أولويتك السفر.
   الطرق الأخرى مارح تتأثر من بريطانيا لألمانيا...
   عدا أنك في حال كنت مخلص الستيبات فيك تقدم على مؤسسة حمد الطبية أو الجامعة الأميركية في بيروت.

بالنهاية الأرض أرض الله
ورزقك مكتوب في مكان
و "لن تموت نفس قبل أن تستكمل رزقها".

والسلام.

https://t.me/medicinewithahmad

طبعا البوست مو سياسي
انما لأخذ فكرة عن موضوع رح يغير وجهة ورحلة وهدف كتيرين للأسف

لزملائنا الدفعة 52 الي قدمو الفحص الوطني من كم يوم
مبارك التخرج إن شاء الله
هاد البوست كان موجه لطلاب الدفعة 51 السنة الماضية.
مروا عليه بسرعة فيو كم شغلة بتفيدكم إن شاء الله.

https://t.me/medicinewithahmad/314

صباح الخير بتوقيت سوريا❤️

فترة الامتحانات كالعادة بتكون تقيلة
وبتبلش فيا أسئلتك الوجودية
عن حياتك عن دراستك عن مستقبلك.

الفترة هي دائما كانت ومازالت صعبة.
وبما انو البعض خلص والبعض رايح يخلص والبعض الاخر عندوه وطني
ف حابب أحكي كلمتين.

ك شخص مرق بهالتجربة (ومازال)
أحد الشغلات الي ممكن تعملها ك trick ع مخك هي كالتالي، وتحمل شوية قراءة زيادة:

✅تعاملك مع الطب على انو مرحلة وبتعدي أكبر غلط بتعملو مع مخك.
تعامل مع الموضوع على إنو حياة كاملة،
وانت بحياتك ك إنسان لازم تاكل وتشرب وتنام ووو الخ.
ف جزء من حياتك هو إنو تدرس للطب.
يعني لا تعتبره فترة وبتعدي، اعتبره جزء لازم تعتاده.
فإذا مشكلتك مع الطب انو تستصعب دراسته، الموضوع محلول.
(إذا بتكرهو، الموضوع مختلف).

عبحكي هالموضوع هلأ لسببين:

1. بشوف كتير بتكتر بهالفترة الستوريات شغل المطلقات (والي هو طبيعي جدا ومازلت بعملها?)

2. انو من يومين وأنا عم شوف مرضى مع الطبيب المشرف بالروتايشن الحالية، بجيه إشعار ع ايميلو، ف ببعتلي بقلي لو سمحت طباع هي الورقة وخلينا نقرأها اليوم سوا.

طلعت هيك، الدكتور عمره فوق ال ٥٠ سنة،
والورقة كانت عن آخر التوصيات الخاصة بعلاج التهاب البنكرياس الحاد.
ف حسيت الشي الوحيد الي عم يشجعو يقرأ كل يوم ويدرس كل فترة (خاصة انو بأمريكا كل 10 سنوات بعد الاختصاص في امتحان البورد لتضل عندك شهادة البورد تبعك) هو اعتبار الدراسة والقراءة هو جزء من حياتو متل أكله وشربه.

قد يقول قائل:
أنا مابحب هيك
بقلك:
أنما العلم بالتعلم

و يا حبيبي، مادام بدك تكمل طريقك بالطب لازم تعود حالك على القراءة والدراسة بشكل عام.

الموضوع شبه دواء مرّ الطعم، بدك تاخدو يوميا لتضل عايش، بعد سنة أو سنتين من تناوله، رح تبلش تنسى مرارته، ومين بيعرف؟

بجوز تشوفه حلو وتبلش تستفقدلو اذا نسيت تاخدو يوم.?

حاليا الكلية عم تعودك ع هاد الجزء من حياتك، جزء الضغط تبع امتحانات كل فترة.
بس بكرا لقدام اذا ما انت من نفسك كان عندك هاد الدافع، شوي شوي بتنطفى.

اخيرا ملاحظة شخصية جدا كبوها?: (اعتبروها دراسة cross sectional عملتا بمخي)

طلاب الكليات الطبية بحس بيمرضو نفسيا اذا ما درسو او كان عندن ضغط الدراسة المتواصل.
شغلة استنتجتها بسبب كترة الاسئلة عالخاص فترة العطل على دكاترة نفسيين ?

فالدراسة نعمة يا شبوب.

تضلو بخير ❤️
ومبارك لشباب الأسنان والصيدلة دفعة Pre5 انتهاء آخر امتحان.

https://t.me/medicinewithahmad

أؤيد جدا كلامه الخاص ب "الإهداء لله" ولا أعتقد بعدم حسن نية من يكتبها، إنما خانه تعبيره. كتب الدكتور حمدي نوفل: الأعزاء الطلاب الذين يتقدمون بمشاريع التخرج: في كل عام أعزم على بسط قواعد بسيطة في الاهداءات ولكني احجم في اللحظة الأخيرة خشية أن يساء فهم المنشور…

السلام عليكم
من أول ما طلعت من سوريا وعم فكر بطريقة نجتمع فيا سوا مرة تانيا ولو افتراضيا على الأقل.

ف قناة Step by Step عاملين webinar رح أحكي فيو عن بعض الأمور الخاصة بالطريق لأمريكا
المميز بهالحلقة انو مارح أحكي فقط عن تجربتي الي أساسا نشرتها من فترة
انما رح احكي معلومات بتخص تجارب لناس تانيين طلعو بفيز وأماكن تانية ومميزة أيضا.

بانتظاركم يوم السبت الساعة 7 مساء بتوقيت مدينة حلب.
12 ظهرا بتوقيت مدينة بوسطن.

صباح الخير وعيد مبارك
إن شاء الله المنشور القادم ومع نهاية عطلة العيد رح أحكي فيو عن ال job title الي بتخص ال research بأمريكا.

فيا توضيحات بتخص البحث عن مقعد بأمريكا.

متل اليوم
من سنتين

طلعت علامتي في الStep 2(عملته بدون step1).
وقتها كنت عبصلي العصر في مسجد الأنوار في نزلة أدونيس وقت فتحت ال Score report.

✅اختصاص بسوريا لسا ما بلشت ومالي عرفان شو بدي لسا.

✅مراسلة مشان research position.. ماعندي أدنى فكرة عنها.

✅لوين الخطوة التالية؟ لسا محتار

✅طيب شو الأدوات الي بإيدي الي تخليني أمشي بطريق معين...تكاد تكون معدومة.

❇️هل في نوايا وغايات في البال؟ أكيد في

❇️هل في خطة محكمة؟ لا

❇️بس في خطة؟ اي كانت خطط وليس خطة.

كلامي هاد لكل أصدقائي وزملائي وطلابي الي عندن الطموح والاهداف كتيرة بس لسا خايفين يبلشو أو مو عرفانين كيف ووين يبلشو

شغلة وحدة بس بدي أنصحك فيا انو قوم بلش وابدأ ❗️

النية تحتاج توكل وتفويض لله
والتوكل يحتاج عمل.

وكلو مع بعضو رح يحتاج توفيق رب العالمين.

أكتب هذا المنشور وأنا أجهز نفسي لتلبية دعوة إفطار تقيمها جامعة هارفارد للطلاب المسلمين في رمضان بعد سنتين من صدور علامتي في الامتحان.

أذكر قول سيدي ابن القيم"لو توكل العبد على الله حق توكله ثم هم بإزالة جبل وكان مأمورا بإزالته لأزاله".

المنشور مو شغل تحفيز وتنمية بشرية (الي بيعرفني عن قرب بيعرف رأيي بالموضوع عموما) انما فقط من باب التذكير والتنبيه.

وفقني الله وإياكم.

https://t.me/medicinewithahmad

أبارك لزملائي الدفعة 51 نتيجة المفاضلة اليوم. الي طلعلو داخليات بأنواعها أول سنة صعبة بس وبعدا بتروق الأمور إن شاء الله. الي طلعلو أشعة ومخبر وتشريح مرضي مبارك لكم الحياة الرغيدة والعمر الطويل. والي طلعلو جراحات (خاصة عظمية و عامة) ودّع أهلك، صحتك، وهيئ…