Онамга.

Она, бунча олис бўлди йўл дегани,
Юрган сари шошиб кетар юракларим.
Йўллар қараб толдимикан кўзларингиз,
Бўлдимикан сизга бот-бот керакларим.

Орзу шаҳри рўёбларни қилди ато,
Ўшандами, тошқалб бўлиб қолдим, она,
Вақт тополмай икки энлик хатга ҳатто,
Йўлдан чиққан дўстлар кўнглин олдим, она.

Ғўр қизингиз ҳолингизни сўрмаганда,
Ўз-ўзингиз нималар деб юпатдингиз?
Мендан биров салом олиб кирмаганда,
Кимдан мени йўқлаб кимдан сўратдингиз?

Булоқдан сув берайинми сизга ташиб?
Кўк чучвара тугамизми бирга-бирга?
Ҳали катта қиз бўлмадим, етаклашиб,
Чиқамизми гул тергани Қияқирга?

Сочларимни яна майда ўрасизми?
Гилам дўппим кийгим келди, топиб беринг.
Арғимчоғим толга солиб учгунимча
Сиз тандирда яна кулча ёпиб беринг.

Эҳ-ҳе, йўлда эканман-а, кўзим кетиб,
Зора уйда бўлинг, болам, кел дегани.
Мана, ҳозир, қолай дедим сизга етиб,
Она, бунча олис бўлди йўл дегани?
@mamurazohid

Китоб тақдимотида. Ўзбек тили ва адабиёти университети ўқитувчиси Озода Тожибоева

Ҳаёт (ғазал)

Эй ҳаёт, ўз жомини оғулаган болим, ҳаёт,
Еру кўкка етмагай, чин, қатра озорим, ҳаёт.

Яккаман, аммо Яратган қўймагай ёлғиз мени,
Кўзда ёш кезсам, ўзинг бор нишли гулзорим – ҳаёт.

Бир сариқ пул қадрича бўлсин, бақадри ҳол сўраб,
То ўлим келгай қадар танҳо харидорим – ҳаёт.

Ёш эдим, ёнган олов, ҳар не тилак – кафтимда деб,
Энди тақдир кифтида имконга иқрорим ҳаёт.

Кел, чидаб кўр деб бу жонни жоизу жо этди Ҳақ,
Зўру ожиз ишқимай, чертилмаган торим – ҳаёт.

Сен шакар-қанд – талху аччиқ, сен қаро кун – оқ ният,
Биру Бордан биргина эъзозлигим борим – ҳаёт.

Сенга кўп қилдим маломат, сен ҳамон қилдинг вафо,
Инжисанг, анжоми ҳозир жисми ҳушёрим ҳаёт.

МАЪМУРА ЗОҲИД

@mamurazohid

ТАФАККУР УЙИНГИЗДАН КИТОБЛАРНИ КЕТКАЗМАНГ.

Shu qatorga munosib ko'rilganimdan juda baxtiyorman. ABDULLA QODIRIY hikoyasi bilan boshlangan kitob...
"KELINOYI' nomli hikoya tanlanibdi.
Hikoyani o'qiganlar bordir. Aziz KITOBXONLARIMIZ borligidan yana yuz karra baxtiyorman.
Bu hikoya ham turk tiliga o'girildi.
Asar avvalroq ijodiy o'zanimizga joylashtirilgan.
@mamurazohid