Жолың болмай, үнемі қиындықтарға тап болып, жылап қала берсең, не болып жатқанын түсінбей, көздерің мөлдіреп жүрген болса…Раббыңды сағынған шығарсың.

Өзің айтшы, Раббыңнан басқа кім сені емдейді? Сен қалай ойлап жүрсің? Көзіңді аш, күшіңді жина.

Әр нәрсеге өзіңді жоғалтып, қолыңды сілтей берсең, ақіретің үшін кім күреседі?

Өз ойыңызды Алла үшін еркін, нық, қорықпай айтып үйренгенде, жүрекке батылдық орнайды. Әйтпесе кім көрінгеннің құлы болып, жаратылғанның разылығынсыз өмір сүре алмайтын хәлге жетесіз.

“Адамдар мені қалай көріп тұр”, “Мен жайлы не ойлап тұр?” “Жоқ дегеніме ренжімеді ме екен?” деп санаңызды құр уайымға саласыз.

Бір жүрекке екі махаббат сыймайды. Жүрегіңіз Раббыңызға ғана ашылсын…

Құлшылықта сабыр ете алмасаңыз, намазды бітіре сала шығып кетсеңіз, дұға етуге, зікір етуге ерінсеңіз- сабырлымын деуіңіз бекер…

Өмірдегі сынақтарға, проблемаларға сабырлымын, сынбаймын деуіңіз бекер, құлшылықта сынып қалсаңыз…Тым құрығанда сабырлы мінезіңізді намаздың соңында көрсетіңіз, тұрып кетуге, әжетқанаға жүгіруге асықпаңыз, бүкіл ғибадаттарыңызды толық орындамайынша тұрмаңыз. Тұрғыңыз келіп кетсе, қамшылай беріңіз…

Намазыңызды уақытылы оқыңыз, проблемаларыңыз азая бастағанын байқайсыз…

Адамдардың қателіктерін есіне түсіріп, күнәсін бетіне басып, жанын тырнай бермеңіз…

Алланы шын жақсы көрсеңіз, бауырыңызды кешіріңіз, оның дертімен дерттеніңіз, бірге шешім қабылдаңыз. Бірақ таза, адал түрде, ақыға кірмей…

Ешкімді соттардың соты - Ақіретке қалдырмаңыз. Ол кезде барлығы біз ойлағаннан да ауыр болады. Фәни өмірде кең, ашық болыңыз адамдарға. Адамның орнын қашан да адам басқан…

Дүниемен, адамдармен алысқанша, Алланың мол, бітпейтін қазынасымен танысыңыз, күнде беріп жатқан сан алуан нығметтерін тамашалаңыз, рақметшіл хәлде болыңыз.

“Мәңгі тірі болған Раббымның қошеметіне қалай бөленсем екен?” деп толғаныңыз, Оның сый-сыяпаты үшін ғана тырысыңыз.

Сіз бен біз секілді болған бейбақтардың қошеметін ойламаңыз, “Қалай назарын аламын?” “Қалай көрінемін?” деп… Бір жыртық бір жыртыққа жамау бола қоймас…

Бүкіл жаратылысты бізге қызметші етіп жаратқан Раббымызға қандай рақмет айтып жатырмыз?

Раббым, мен өте нашар құлмын, түсініп тұрмын, бірақ мен дәл қазір қатты мазасыз күйдемін. Бірақ мені Өзің сақтайтыныңа сенемін.

Раббым, жүрегімнің тас боп кетуінен қатты қорқамын, Сенен жырақ өмір сүруден қорқамын, Сен маған керексің, Сен маған қымбатсың. Тот басып, тозып кетуімнен сақташы мені…

Раббым ризығымды тарылтты деп ойлап жүрсіз бе?

Күйеуіңіз жүзіңізге жымиып қарағанын есіңізге алыңызшы. Ол осындай жылы жанарымен тек сізге ғана қарайды. Ол сыртқа көрсете бермейтін нәзік махаббатын сізге ғана арнайды. Демек, күйеуіңіздің махаббаты - ризық…

Ата-анаңыздың “қызым, шай құйшы” деген сөзін есіңізге алыңызшы. “Қызым” деп олар тек сізге айтады. Олардың “қызы” сізсіз. Басқа біреу емес…Олар “ай қызым, балам, аурып қалма, салқын су ішпе” деген бұлтартпас биік қамқорлығын сізге ғана көрсетеді. Демек бұл да ризық…

Балаңыздың “мама, саусағыма тікен кіріп кетті, алып берші” деп монтиып келіп тұрғандағы жанарын көз алдыңызға елестетіңізші. Оның мамасы сіз ғой. Сізге еркелейді, мерекелерде сізге арнап өз қолымен сурет салады, ашық хат жасайды. Мамасына арнап өлең жазады. Яғни сізге арнап…Сізге де біреудің баласы емес, өз балаңыз қызық қой, балабақшада не істеді, ұйықтады ма, сабақ оқыды ма- осының бәрі қызық қой…Демек балаңыз да ризық екен…

Біліп қойыңыз, сізге қараған жылы жанарлар, әдемі махаббаттар, бұлтартпас биік қамқорлықтар, ата-анаңыздың алғысы, жарыңыздың жылы сөзі, балаңыздың балалығы, досыңыздың бауырлығы- бәрі ризық!

“Ата-анамды қалай кешірсем, қабылдасам екен?” деген сұрақтың өзі- күнәлі, жаман сұрақ. Ата-ананы Алла Тағала биік етті, Құранда “оларға уф демеңіздер, дұға етіңіздер” деп ескертті.

Сізге қабағын түйіп, сізден разы болмай, ашуланып жүрген ата-анаңызды көрсеңіз- сыртынан дұғаңызды күшейтіңіз, дұғаның ықпалы тас боп қатқан жүректерді жібітеді. Айтқан сөздері шымбайыңызға батып, нәпсіңізді жұтып бара жатса да, Исламның туын көтеріп, күліп қана жауап беруге тырысыңыз, қабағыңызды түйіп, өзіңізді, ойларыңызды қорғауға, қарсы шығуға тырыспаңыз.

Ата-анаға қарсы шығатындай, олар сіздің жауыңыз емес, Раббыңыздан кейінгі сүйгендеріңіз, қос қанатыңыз…