Сен тонгда уйғондинг. Газга қўйдинг чой.
Бу меҳр мен учун эмас, ҳойнаҳой.

Сен оппоқ кўйлакка урасан дазмол.
Бу ишни мен учун қилмоғинг - маҳол.

Уйни супирасан, поклайсан чангдан.
Супириб отмайсан мени бу ғамдан.

Овқат пиширасан. Мўл-кўл дастурхон...
Овқатингни мақтар ўзга бир инсон.

Болангнинг кўзига боқиб тўймайсан.
Сен менинг боламни ўпиб қўймайсан.

Аммо ёлғиз қолсанг эгилар бошинг -
Кўзингдан сўрамай оқади ёшинг.

Мени соғиндингми? Куйдингми?.. Раҳмат!..
Кўз ёшинг меники, кўз ёшинг фақат...

✍ Усмон Азим

@sheriyatuz

Ногоҳ салқин келди август сўнгида,
Ёмғир ёғиб ўтди бугун эрталаб.
Эрталаб - сабрнинг кўзи ўнгида –
Мен сенинг исмингни айтдим эркалаб.

Ногоҳон ўзгариш этдими таъсир,
Ё салқин хотиранг етди – билмадим:
Кўнглимни эрталаб этмадим таҳрир -
Эркалаб исмингни айтдим. Йиғладим.

Тушиндим - тақдиринг ишин юритган
Беюрак ройишлар ҳақлидир, ҳақли.
Ўйладим: - Албатта, мени унитган! -
Албатта, бахтлидир! Албатта, бахтли!

Асли бу мунг нечун? Тақдир ҳал бўлган.
Умрдан неча кун қолди? Билмадим.
Сенсиз ўлмоғимга қисматим кўнган...
Барибир йиғладим.

✍ Усмон Азим

@sheriyatuz

SADOQAT

Keksa qarag‘ayning
Ildizin ochib,
Tortdilar qo‘sh arqon solib belidan.
Lekin u tuproqqa panjasin sanchib,
Sira qo‘zg‘almasdi
Ungan yeridan...

Nihoyat, gurs etib yerga quladi,
Butab, so‘ng ko‘tarib ketdilar,
biroq -U o‘z panjasida olib jo‘nadi
Yashagan yeridan Bir siqim tuproq. @sheriyatuz

Men uni huddi odamlar uyquga ketgandek sevib qoldim - avvaliga sekin-asta, keyin birdaniga.

D. Grin "Yulduzlar...

@sheriyatuz

Yo'llar

O'sha o'sha yomg'ir va o'shanday yo'l,
Qachonlardir birga ikkimiz yurgan.
Jilmayib, qo'limga uzatganding qo'l,
Ruhim zulmatlarin to'ldirib nurga.

Ikkimiz yurganda negadir ko'cha,
Tez tugab qoladi - deganding to'xtab.
Tun bo'yi daydiyman, chiroqlar o'char,
Sensiz ko'chalarning poyoni yo'qday.

✍️ X.Vulqon
@sheriyatuz

ДЕНГИЗДА

Қандай чексизлик!
Қандай тубсизлик!..

Яйраб яшаш мумкин.

Аммо осмонга ўзини отди
Денгизга сиғмаган бир балиқча.

Шу балиқча билан суҳбат қурсак...
Майлими денгиз,
Дунёнинг торлиги ҳақида,
Осмоннинг борлиги ҳақида!

Бирор наҳанг ютиб юбормасдан
Суҳбат қурсак, майлими?..

✍ Усмон Азим

@sheriyatuz

#BoburDay
@sheriyatuz

Tishing dur, labing marjon, xading gul, xating rayhon,
Yuzung xur, soching anbar, so’zung mul, menging meynon.
Meynon menging, so’zing mul, anbar soching, yuzung xur,
Rayhon xating, xading gul, marjon labing, tishing dur.

Tafohur ko’zum, ko’nglum qilurlar magar bordur,
Ko’zunga ko’ngul vola, yuzunga ko’zum hayron.
Hayron ko’zum yuzunga, vola ko’ngul ko’zunga,
Bordur magar, qilurlar ko’nglum, ko’zum tafohur.

Tafakkur necha qilsam topilmas sening misling,
Pariydek seni ko’rdum emassen magan inson.
Inson magar emassen, ko’rdum seni pariydek,
Misling sening topilmas qilsam necha tafakkur.

Balodur manga hajring, davodur manga vasling,
Itobing manga ofat, hadising manga darmon.
Darmon manga hadising, ofat manga itobing,
Vasling manda davodur, hajring manga balodur.

Chu Bobur sanga quldur nazar qil anga zinhor,
Topilmas yana bir qul aningdek sanga, ey jon.
Ey jon sanga aningdek, bir qul yana topilmas,
Zinhor anga nazar qil, quldur sanga chu Bobur.

#BoburDay @sheriyatuz

#BoburDay
@sheriyatuz