Акрамжон, олқишлар сизга ҳам бўлсин! Кичкинтойлар учун старт берганингиз учун ташаккур. Болажонларимиз соғ-саломат катта бўлишсин.

1-июнь Халқаро болаларни ҳимоя қилиш куни!..

ЎРМОНЖОН ҚЎШИҚЛАРИ

СИЧҚОНБОЙНИНГ ҚЎШИҒИ

Яшаб ковак-кандикда,
Яшашни ўргандикда.
Ун халтани кемириб,
Кетдим роса семириб.

Омборни кезиб роса,
Чиқардим бир хулоса.
Нари юрсанг қопқондан,
Ризқинг тушар осмондан!..

ТУЯҚУШНИНГ ҚЎШИҒИ

Дерлар мени Туяқуш,
Мен на туя, ва на қуш.
Гавдам туяларга хос,
Патларим қушларга мос.

Эплолмайман учишни,
Ва ё янтоқ титишни.
Бўлса сенда фаросат,
Бўлма мендай аросат!..

Акрамжон АЗИЗОВ,
Фарғона, Олтиариқ тумани.

Ассалому алайкум!

1-июнь Халқаро болаларни ҳимоя қилиш куни!

"Мен сизларни яхши кўраман" китобидан

Б О Л А Л А Р

Тўнғиз ҳам болам деб куяди,
Кир, иркит бўлса-да димоғи.
Қўнғиз қоравойин суяди,
Зурёди - ҳаммадан оппоғи...

Туя бўталоққа жон тиккан,
Бузоғига говмиш энтиккан.
Бўлса ҳам вужуди ниш, тикан,
Кирпининг сағири - юмшоғи...

Қулунин ярай деб кунига,
Жайрон юрак сиғмас қинига.
Бол ташир болари инига,
Жужуқлари - тенгсиз гулбоғи...

Ит ўпар кўппагин юзидан,
Шер қолмас шербачча изидан.
Ўт чақнар биянинг кўзидан,
Кишнаганда илк бор тойчоғи!..

Фарзанд инган она қонига,
Чорлайди ҳамиша ёнига.
Ҳар не-ки тегса ҳам жонига,
Болалар - кўнгилнинг ардоғи!..

Тақдир, топ ҳар ишнинг чорасин,
Айирма ҳеч кимдан онасин.
Бир бор эркаласа боласин,
Ёзилар дунёнинг чарчоғи...

Дунёнинг эркаси - болалар,
Келажак-эртаси - болалар.
Бугуннинг эгаси - болалар,
Бўлмасин умрингиз адоғи!..

Акрамжон АЗИЗОВ,
Фарғона, Олтиариқ тумани.

"SO'NGGI QO'NG'IROQ" 🍃❤️ 🔔

✍ AKRAMJON AZIZOV

🎙 NODIRAXON

Шеър ўзи зўр , ижро хам зўр. Бир-бирига хамоханг. 👍👍👍

S Oʻ N G G I Q Oʻ N Gʻ I R O Q

Bugun quyosh nurli boqadi atay,
Yashnar har yurakning koʻksidagi bogʻ.
Koʻngilga tarovat baxsh etmoqqa shay,
Oxirgi qoʻngʻiroq -soʻnggi qoʻngʻiroq!.

Xoʻrsinib boqar kim sinfdoshiga,
Yurakda hayajon-yurakda titroq.
Diydorga zorlarni chorlar qoshiga,
Oxirgi qoʻngʻiroq-soʻnggi qoʻngʻiroq!

Guldasta koʻtarib jajji qoʻlchalar,
Aka-opalarga yoʻl tilar oppoq.
Voajab! Ayriliq kuyini chalar,
Oxirgi qoʻngʻiroq-soʻnggi qoʻngʻiroq!

Mayli,qayda boʻlmang,baxtingiz kulsin,
Dilgir ustozlarni unutmang biroq.
Mangu mehr boʻlib jaranglab tursin,
Oxirgi qoʻngʻiroq-soʻnggi qoʻngʻiroq!

Qalbga aziz koʻpni koʻrarsiz, va lek,
Maktab ostonasi-muqaddas tuproq.
Eng aziz kunlarga chorlab turgandek,
Oxirgi qoʻngʻiroq-soʻnggi qoʻngʻiroq!..

Yurtim!
Kel,dunyoga buraylik yuzni,
Qanot yoz!
Hilpira,ey,moviy bayroq.
Yangi hayot sari boshlasin bizni,
Oxirgi qoʻngʻiroq-soʻnggi qoʻngʻiroq!

🎙Qambaraliyeva Kamola
✍Akramjon AZIZOV,
(Fargʻona, Oltiariq tumani)

"Рамазон илҳомлари" туркумидан

С А Б Р

Сўрадилар ҳаким зотдан: Сабр не от?
Ўйлаб туриб жавоб қилди муборак зот:
Не-ки бошга тушса дарров унутгайсиз,
Сабр бирлан хайрли кунни кутгайсиз.
Миқ этмайсиз: дил девона, юрак далли,
Бу сабр ва қаноатнинг энг гўзали!..

Нимаики содир бўлса, қабул қилиб,
Илтифот-ла юзларингиз турса кулиб.
Кўнглингиздан мудом тошса иймон иси,
Бу сабр ва қаноатнинг энг тўғриси!..

Яна бири: ҳаммасидан кечасиз воз,
Вужудингиз сабр билан қилиб пардоз.
Яшагайсиз тишни-тишга қўйиб кунни,
Бу сабр ва қаноатнинг энг қийини...

... Барча ишни Аллоҳ учун қилиб нисор,
Ким яшолса ҳатто мўр*га бермай озор.
Фақат Ҳаққа қарздай бўлса жон нафаси,
Бу сабр ва қаноатнинг энг каттаси!..

Аллоҳ Акбар!
Аллоҳ Малик!
Аллоҳ чевар!
Севса фақат сабр қилган зотни севар...

Акрамжон АЗИЗОВ,
Фарғона, Олтиариқ тумани.

Мўр* - форсчадан чумоли.

СЕВМАГАНСИЗ СИЗ МЕНИ ДИЛДАН...

Сув бўйида бир қиз битар хат,
Гўёки бўлгандай мосуво тилдан.
Қоғозга тўкилар изтироб ва дард,
"Демак, севмагансиз сиз мени дилдан!.."

... Синглим, ҳаётнинг ўз қонунлари бор,
Ўнқир-чўнқир, чағир сўқмоқлари кўп.
Баъзан пок дилларга етказар озор,
Кутилмаган жойдан тўқмоқлари кўп...

Севги ўзи нима?! Митти юракка,
Жойлана ололган каттакон дунё.
Гоҳо ўҳшаб кетар ширин эртакка,
Гоҳда ростга ўраб қўйилган рўё...

Майли, ҳар севган дил етсин тилакка,
Бир бевафо ёр деб ўксинтирманг жон.
"Мени дилдан севинг!", - дея юракка,
Буюриб бўлмайди, синглим, ҳеч қачон!..

Фақат муҳаббатдан бурманг сира юз,
Чин ошиқ хаёли, ёри - муҳаббат.
Севги йигит ори, ишқ - номусли қиз,
Ҳазрати Инсоннинг зори - муҳаббат!..

Акрамжон АЗИЗОВ,
Ўзбекистон, Фарғона, Олтиариқ.

👍

Офарин Ал Фарғоний суякларимгача жимирлаб кетди. Тасанно.