İrlándiya, Norvec iyan İspániya bayonıšon kárda ki máya mángi 28 ada Falastina devlati rasman qabul bakárden.

Ca Norveci sanozir, Jonas Gahr Store-i votaše ki qabul nıkaš, "Neza Hašipema ada ášti abıni."

Im qarori ko bapešta İsráil İrlándiya iyan Norveci ko ıšta nımoyandaon ba dumo ogırdıvonaše. Caš kárda beda ki İspániya ko an ıšta safiri ba dumo obagırdıne.

Ca İMT an kámi 140 gıla nomža Falastina devlati qabul kárdedan, ammo ca G7 hic gıla nomža ay qabul kárdedanin.

İsráil pona sori oxı ko bapešt ba Falastinıžon tumabıri davom doda kárde. 40 hazo sa vey odam İsráili tarafi ko kıšta bıa. İsráili sanozir iyan jo gıla bárza vazifaina šaxson rásist iyan tumabıra nitqon ba zıvon várdašone.

Sákit Okeán árxipeláqi Nua Koledániy ada, ružbaruž tınd bıa zuegat ada co kasi márde bapešta tádiba sa vaziyat elon kárda bıa.

Firangıstoni dıla koon nozir Geráld Dármáni votaše ki, se vırayža Kánák xalqo iyan i gıla polisa koaka márde sabab bıa zuegati ce Ozobižoni tarafo faol dástak doa bıa.

“Cı káli sepáratavonon de Ozobižoni ba sávdo daše tasuf kárdam. Dımiy an žıgo, cana mudáxila jahdon bıbun an, Firangıston ıšta arozi ada sabasože” – noziri žıgo votaše.

Firangıstoni arozi bıa Nua Koledániy ada budyandı se kara - 2018, 2020 iyan 2021-mina soron ada bo sabasožati ro referendum davordına bıbu an, veyati cı Firangıstoni tarkib ada mánde vıžnašone.

Ozobižoni rasmiyon ce Firangıstoni ittihomon ba hašašon bekárda. Lokin Rasmi Boku oxona soron ada budyandı dınyo ada ba muxtalif sepárátavona dástaon dástak doaše.

Haman Ozobižon ada to ba ısat hic šuš sacın davordına bıani.Ozobižoni hıkumat 100 sori sa veye ki, ba Tolıši iyan jo xalqon vayna terora siyosat ba žimon davordıneda.

İronıvıža millata vakil, Ahmad Báxšášey Ardastâni votaše ki İron ce nuva ávžori soyb e, ammo rasmiya bayon kárdedani.

"Áz fik kárdedam ki ama nuva ávžori ba amal várdamone, ammo ımi elon kárdedanimon. Cumcıro cama siyosati maqsad ba nuva bombaon soyb be ye." Ardastâni ba "Rouydad 24" xaba ágentati žıgonaš vota.

Mıddati banáv Ca İbemona Millaton Taškiloti Átoma Nazorata Ágentati rahbari votašbe ki İron "cánd gıla" nuva bomba istehsol kárde ro ba vas qadar uráni málik e.

Neza ružon ada Ozobižon-İrona márz ada "Gız Gálásı" hidro umužgo ba ko babe.

Bı haxada cı İroni "Mehr" ágentati xaba doaše.

"Cı sarzamini kobasona-qarb ada yola láyiha, ova elektrika stánsiya eža sa babe i acay okárde ro tanatanayna marosim davordonia babe"- ce İroni Šarqi Ozobižon Regionála Ova Širkati ijrokora direktor, Yusif Gafforzoda votaše.

Ay votaše ki "Gız Gálásı" OES ba ko bino kárde ku bapešt di tasarufot ra obazávziya, ce regioni iqtisod i turizm İnkišof bakárde.

İsráili lašgar ba Rafáh šahri daše hozı beda.

İsráili votaše ki, cı HAMÁS'i silohina dásta oxona mutašakila bátályoni mahv kárde ro ba Gazzá palosa Rafáh šahri hıjum bakáy.

İ xayli kason ımi ba falastinıvıžon vayna tumabıri idomayn iyan bo İsráili ro xatoina amaliyot be hisob kárdan.

HAMÁS cı rımuzi pevılo be bapešta xabadoatiš kárda ki, cı İsráili ım qaror bay boho ba sa bome.

Ce İsráili sanozir Benyámin Netányáhu de Rafáhi išqoli ángıl bayandı zidd bıa fikron ba ozıvonıš várda.Cánd máng ba náv ay votabıše ki, agam de HAMÁS'i roziyati nıbu ba Rafáhi mudáxila bakáy.De HAMÁS'i roziyati ro gapžemonon ba váxti “išqol ce roziyati be nıbe ku baškıriya ni” cımi ba náv ıšta vota fikron ba hašaš ža.

Alán ada mamlakat ada i xayli ultrámillatavonon bay ku Rafáhi išqol kárde talab kárdan.

AİŠ-ada bıa Universiteton ada İsráili ba falastinıvıžon vayna tumabıra siyosati, etiroz ve bıa.

Káliforniya Universiteti talabaon ba polisi etirozon ogate amri tábe bıanin. Cımi bapešta polisi ba universiteti de zuegati mıdoxilaš kárda.

Haman ba İsráili tumabıra siyosati dástak doa i dásta rádikál ba dinj etiroz kárda talabaon hıjum kárdašone, bavon fiziki zadaşon ža. Polis an ba rádikála dásta vayna hic gıla tadbir vindašni.

AİŠ'i respublikavon Fox News vindasado hodison borada dıvua rımuz pevıloš kárda.Davárda prezident Donáld Trámpi ba talabaon vayna zuegati tatbiqi dástak doy bapešta bacay vayna sosiála šabakon ada etirozon bino bıa. Cánd gıla respublikavoni ba Trámpi i karan sado nıdoy votašone.

Ce Mıdofia Nozirati sistem ada 143 milyon mánot ixtilosi hax ada mahkama otırkárde natija ada oško bıa ki mavotban, budja vasoiton dızdiye ı báxša kárde ro maxsusiya mexánizm heste. A ıstırukturun ki ba nozirati tábe in, hamina mexánizmi asos ada harakat kárdedan.

Im mexánizimi hax ada ce Mıdofia Nozirati Moliya ı Budja ro Saidora kána rais, generál-máyor, Nizámi Mammadovi márti 14 ada Boku Harbiya Mahkama ada gapıž ža. Cay votayon asos, harbiya hissa iyan jo gıla orgánon ada šaxsiya heyati ášmárdi asos ada smeta tartib kárda beda, iyan "alova xárjon pardoxt kárde" nomi na budja ku vasoiton jo kárda bedan. Sor ada i kara taftiš ı osa kárde hangoma, mıayyan bedabe ki mablaq heste ki tayinoti asos ada xárj kárda bedani. Hamina mablaqi 50 foizi ba nozirati rosoniye ro ba taftiši bárda odami dodabin. Hamina 50 foizi 20 foiz ba moliya, 30 foiz ba taftiša šeban rasedabe.

"Lašqar soxta bey ku žıqo - 1993 mina sori ku žıqona qáyda tayin bıa. Faqat cımı vaxt ada ne, mı ku banáv, rais, Námig Poládovi vaxt ada an ım qáyda hestıbe.", - generál, N. Mammadovi ıšta ifoda ada votaše.

Av lašgari Talim ı Tadrisa Mərkazi Moliya Xidmati sobiga rais, polkovnik-leytenánt, Rašád Malikzoda mahkama ada šohid taki ifodaš doa. N. Mammadovi ıštan an habs ada ye, alon Boku Harbiya Mahkama ada cay mıhokima davom kárdeda.

Mıdofia Nozirati sistem ada 143 milyon manot ixtilosi goroš a šaxson ki avoni ba jinoyata koy ro ba masuliyat jalbıšon kárda, cavon masala bo cánd gıla hissa jo kárda bıa. Cavon mahkaman jo-jo davordona bedan. Ca xuna ıšta mahkama ada taqsirina šaxs jo kasi mahkama ada bana šohidi gap žayda

De “Ábzás Media” ko ángıl okárda bıa jinoyata kosa habs kárda bıa žurnáliston-cı našri dırextur Ulvi Hasanli iyan saredáktor Sevinj Ábbásovi (Vágifgızı) hax ada silista dovri ro vıžna bıa qati habsa tadbiri mıddat dıroz kárda bıa.

Taqsirkor zına bıa žurnáliston ıštanan bacavon vayna bıa nionia molahváta ittihomi soxta be, “Ábzás Media” ada ba korrupsiya otırini gora jazodoa be votedan. Avon ımiyan votašone ki, mahkama ku obyektiva iyan adolatina qaror caš kárdanimon.

Ba Sevinj Vágifgızi ko dia kárde ada day hokim Rafáel Sádıxovi árada mıbohisa bıa. Žurnálist de siyosia siforiši hokimat ada korrupsiya fáš kárde gora jazo doa be vote ada hokim acay sıxáni bırniyaše. Bım ada Sevinj Vágifgızi ba hokimi votaše:

“Tı cımı sıxáni bırniye azınıš. Nain ki tı, batı amr doa kason an nibaznen. Tı ku farqin, áz ozod gıla odamim”.

Ce Ávropa Párlámenti ba Ermanistoni Áİ uzvati nomizati státusi doy qatnoma de xayli sado qabul bıa. Ba qatnoma leh 504, ba aleyh 4 sado doašone. 31 deputát betaraf mánda.

Qatnom ada Ávropa İttifoqi, Ávropa Komissiya i Ávropa İttifoqi Šurá sado kárdan ki de Áİ amakdošati hıvuž kárde ro ba Ermanistoni dástak bıbun. Im an qeyd kárda bıa ki ıyo sıxán igla iqtisodi ku šeda ni, ham an siyosi diálog, bexatoati, odamon i jo kišvaron árada miža sferán ku šeda.

Malumot ada vota beda ki ım qatnoma ce Ávropa Párlámenti jo qatnoman taki ijro kárde ro ijbori nıbu an, ım hodisa Yereváni ba Ávropa xıyzuni hani an nez be niyati Ávropa ku imina reáksiyaye.

Davárda sor İroni bexatarati ágentati 300-sa ve zanani de siyosi iyan ideoloži sababon ogataše, kámi na ku 100 zanan de mıxtalifa ittihomon habs kárda babe.

Imi “Hengáw” odama haxon soxtemoni votaše.

Davomi ro: https://avasor.tv/2024/03/11/davarda-sor-ironi-bexatarati-agentati-300-sa-ve-zanani-de-siyosi-iyan-ideolozi-sababon-ogatase/