នៅថ្ងៃសុក្រ ២រោច ខែពិសាខ ឆ្នាំរោង បញ្ចស័ក ព.ស ២៥៦៨ ត្រូវនឹងថ្ងៃទី២៥ ខែឧសភា ឆ្នាំ២០២៤ លោក ឃាង សុផល លោកស្រី រ័ត្ន បុប្ផាម៉ូនិច និងកញ្ញា គ័រ នូណា តំណាង ឯកឧត្តម លី ច័ន្ទតុលា ប្រធានក្រុមការងារចុះជួយសង្កាត់វាលពង់ និងលោកជំទាវ ឈីវ ភិរម្យ បានទៅសួរសុខទុក្ខបងប្រុស ចត់ សុខគង់ អាយុ ២៧ឆ្នាំ ជាប្រជាពលរដ្ឋរស់នៅភូមិវាលពង់ សង្កាត់វាលពង់ ក្រុងឧដុង្គម៉ែជ័យ ខេត្តកំពង់ស្ពឺ ដែលកំពុងសម្រាកព្យាបាលជំងឺនៅក្នុងមន្ទីរពេទ្យកាល់ម៉ែត ដែលបានជួបនឹងគ្រោះថ្នាក់ចរាចរណ៏កាលពីយប់ ថ្ងៃទី២៣ ខែឧសភា ឆ្នាំ២០២៤ នៅជិតស្ពានជ្រោយចង្វារ។

បច្ចុប្បន្ននេះ អ្នកជំងឺបានទទួលការវះកាត់ជើងស្តាំដែលបានបាក់ដោយជោគជ័យ និងកំពុងត្រៀមវះកាត់ផ្នែកដងកាំបិត ជាដំណាក់កាលបន្ទាប់។ ក្នុងឱកាសនៃការសួរសុខទុក្ខនេះ ក្រុមការងារបានពាំនាំពាក្យសួរសុខទុក្ខពីសំណាក់ ឯកឧត្តម លី ច័ន្ទតុលា និងលោកជំទាវ ឈីវ ភិរម្យ និងបាននាំយកទឹកត្រចៀកកាំ ១យួរ ទឹកដោះគោឆៅ ១យួរ និងទឹកប្រទាលកន្ទុយក្រពើ ១យួរ ព្រមទាំងថវិកាចំនួន ៣០ម៉ឺនរៀល។ ក្រុមការងារចុះជួយសង្កាត់វាលពង់សូមជូនពរអ្នកជំងឺ ឆាប់ជាសះស្បើយ និងមានសុខភាពល្អ ក៏ដូចជាសូមអរគុណដល់មន្ទីរពេទ្យកាល់ម៉ែតដែលមានវិជ្ជាជីវៈខ្ពស់ធ្វើការប្រកបដោយគុណភាពខ្ពស់ និងបានខិតខំប្រឹងប្រែងព្យាបាលអ្នកជំងឺឲ្យបានធូរស្បើយ។

ក្រោមការដឹកនាំរបស់ឯកឧត្តម ហ៊ុន ម៉ានី ប្រធានក្រុមការងារគណបក្សចុះមូលដ្ឋានខេត្តកំពង់ស្ពឺ ក្រុមការងារចុះជួយសង្កាត់វាលពង់បានបង្ហាញពីការយកចិត្តទុកដាក់ខ្ពស់លើសុខទុក្ខរបស់ប្រជាពលរដ្ឋ និងចូលរួមចំណែកជួយសម្រាលទុក្ខលំបាក ព្រមទាំងផ្តល់ជំនួយនានាតាមលទ្ធភាពដែលអាចធ្វើទៅបាន។